صور ...أبيض و أسود

صور ...أبيض و أسود
بهتانين ...
متبعترين ...
ده ... كان انا
ودى ... كانت انتى

كنا ميين ...وبقينا مين...!

كنا فالشارع بنلعب
عند بيت جدى القديم
لون قلوبنا لسة ابيض
ما أتجرحش من السنين

كنا ميين ...وبقينا مين...!


كانت الضحكة بتطلع
زى نجمة ف ليل حزين
لو فيوم حسينا برد
كان يدفينا الحنين

كنا ميين ...وبقينا مين...!


صورة تانية كنا فيها
والأيدين متشبكين
راسمة باسمة فوق شفايفك
والعيون متكحلين

كنا ميين ...وبقينا مين...!


لية قلوبنا إسّوَد لونها
بينا ليه مات الكلام
ليه بقينا بعيد قوى
واحنا بينا خطوتين

كنا ميين ...وبقينا مين...!


كنا واحد ...
كنا عيلة ...
كنا قلب ...بدقتين
ليه بقينا يا حبيبتى ...
اتنين ...
صورتين ... ابيض و أسود ...
بهتانين ...
كنا مين ...
وبقينا مين ...!

منقول للأمانة
بس بجد توبيك جامد اوى حبيت انقله ليكم